Men Wesley Sneijder

1984-nji ýylyň 9-njy iýunynda Utrechtde futbolçy maşgalasynda doguldym. Kakam futbolçydy. Agam Jeffrey ýaly, menem Ajaxyň ýaşlar ýygyndysynda futbol oýnap başladym. Heniz 17 ýaşymdakam egnime Ajax köýnekçesini geýip ýaşyl meýdança çykyp başladym. Real Madrid meni 27 mln euro satyn alýança Ajaxda 5 ýyl oýnadym. Ajaxda oýnan döwrümde jemi 181 oýuna çykyp 58 gol saldym we 43 goluň pasyny berdim. Bir gezek Eredivisiede çempion boldum, iki gezek KNVB kubogyny, üç gezegem Johan Cruijff Schaaly gazandym.

Euro 2004-de Gollandiýanyň milli ýygyndysy bilen ýarym finala çenli gitdik. Men ol döwürler başlangyç düzümde oýnamokdym. Grupbalarda diňe iki gezek oýuna soňundan giripdim.

2006 FIFA World Cupda grupbadaky 4 oýunda-da başlangyç düzümde oýnapdym, emma çärýek finalda Portugaliýadan 1-0 utulyp öýe gaýtmaly bolupdyk.

2007-08 möwsüminde Royston Drenthe we Arjen Robbenden soň Real Madride geçen üçünji Gollandiýalydym. David Beckhamyň 4 ýyl geýen 23-lük belgisini aldym. La Ligadaky ilkinji oýunymda Atletico Madride gol saldym. Ikinji oýunymda bolsa Villareala iki gol saldym, biri jerime urgusydy.

Euro 2008-däki Russiýadan 3-1 utulyp öýe gaýdyşymyzy ýatlatmak hökmanam däldir.

2008-nji ýylda Robinho Manchester Citä gidensoň 23-lük belgini Rafaele (van der Vaart) berdimde özüm 10-luk belgini geýip başladym. Real Madridde ilkinji oýnan möwsümimde La Ligada çempion bolduk, soňky ýyl bolsa finalda Valenciany ýeňip Ispaniýanyň Super Kubogyny aldyk. Göräýmäne hemme zat gülala-güllükdi. Emma 2009-njy ýylyň 27-nji awgustynda Real Madrid meni Intere 15 mln euro satdy. Netijede Real Madrid köýnekçesi bilen 66 oýunda 11 gol saldym we 11 assist etdim.

Intere gelemsoňam egnime 10-luk belgini geýdim we bir ýerde gazanyp boljak zat bolsa gazandym: Serie A-da çempion boldum, Italiýa kubogyny aldym, Italiýa Super Kubogyny aldym, UEFA Çempionlar Ligasyny aldym, FIFA Club World Cupy aldym. Gollandiýanyň milli ýygyndysy bilen Dünýä kubogynda finala çenli gitdim. FIFA bolsa elinde La Liga çempionlygyndan başga hiç zat bolmadyk oglanjyga Ballon d'Or berdi...

2009-njy ýylyň dekabrynda aktrisa Yolanthe Cabau van Kasbergen bilen adaglandym we 2010-njy ýylyň 17-nji iýulynda öýlendim. Javier Zanettiň saýasynda Katolik boldum we Milanda baptist edildim.

Agam Jeffrey, Maarten Stekelenburg we Rafael van der Vaart ýaly futbolçylar bilen bilelikde Ajaxyň ýaşlar ýygyndysynda futbol oýnap başlapdy. 2001-nji ýylda bolsa Stormvogels Telstara transfer boldy. 2004-nji ýylyň fewralynda menisk bolup bir salym futbol oýnap bilmedi. Şol ýylyň awgustynda Jong Ajaxa geldi täzeden futbol oýnap başlady, emma futbol oýnamak eýýäm oňa kyn düşüp başlady (wah ençeme ýyldyzyň kariýerasyny zaýalan şikesler) 2005-nji ýylda Jong RKC-de futbol oýnamagyny dowam etdirdi. 2006-njy ýylda FC Den Boscha, 2007-de bolsa höwesjeň ligadaky USV Elinkwijke geçdi. Şu wagt bolsa uly futboly taşlady.

Maşgalamdaky ýene bir futbolçy bolsa 20 ýaşyndaky inim (31.03.1991) Rodney Sneijder. Olam Jeffrey we men ýaly Ajaxyň ýaşlar ýygyndysyndan ýetişdi we Eredivisieň Ultrechtinde kärendesine oýnaýar. Ol ligadaky ilkinji oýunyna 2011-nji ýylyň 27-nji awgustynda çykdy we Roda JC gol saldy.

2008-nji ýylyň maýynda Real Madrid Rodneyi satyn aljak boldy. Rodneyiň Real Madridde oýnajagy üçin  begenjiniň çägi ýokdy. Emma eşiden badyma inime Real Madride gelmezligi maslahat berdim. Sebäbi men ýaş oýunçylaryň göni uly toparlarda oýnap başlamagynyň tarapdary däl. Inime ilki Ajaxda özüni görkezmegi maslahat berdim.