El Clásico

7 ýyl bäri Real Madridiň janköýeri. Şu sezon hemme oýunlary gördüm, sypdyran bolsam 1-2 oýun sypdyrandyryn. El Clásicoda gelip ýetdi. Colalar taýyn. Bizem telewizoryň öňünde taýyn. Madridiň utjagyna çynym bilen ynanýan. barçaň iň uly ýaragy messi diýýäler. Men xavi bilen iniestadan gorkýan. Biziňem Ronaldo, Di Maria, Benzema ýaly ýaraglarymyz bar. Emma iň uly ýaragymyz Mourinho. Eger-de köphudaýlylyga ynanýan bolsam, (haşa), futbolyň hudaýynyň Mourinhodygyna ynanardym.

Oýun başlady, heniz 10-njy minutda 1-0. Aýdyşym ýaly, iniestaň şutuna xavi nokady goýdy. 18-de 2-0. Onda-da ikinji time oýunymyzyň gitjegine ynanýan. Birinji time 2-1 gutarsa gowy boljak diýýän. Ikinji time hiç zat üýtgemedi. Aslynda üýtgedi, birinji time näme-de bolsa hüjüm edýärdik. Ikinji time Madridlileň aýagyna topam düşenok. ..we 4-0. Bu oýuny utup bolmajagy köre mälim. Emma ertir köçä çykmaga ýüz gerek. Iň bolmanda 4-2 bolsa diýýän. Ýok. O bolşuna ýanymda oturan birgiden Milan janköýerleri.. Hany Çempionlar Ligasynda 2 oýunda-da utup bilmediler. Indi barçaň ýeňişine tomaşa edip özlerini köşeşdiren bolýalar. Ahyram biri ýanyndaka eli bilen meni görkezip bir zatlar diýdi. Boşan colaň boklažkasyny aýlap zyňdymda turup gitdim. Gapa şeýle bir urdum welin 4-5 minutlap elimi duýmadym, gapa ýelmeşip galdy göýä..

5-0 gutaran oýundan soň uniwersitete gitdim. Oglanlaň biri salamdan öň eli bilen "bäşlik" görkezdi. Menem hiç zat diýmän gapdalyndan geçdim, koridoryň beýleki ujunda çugutdyryp otyryn. Bir gyz gelip ýagdaýymy sorady, erbet diýdim. Näme bolanyny aýtjak dälmi diýdi. Gepleşesim gelenok diýdim.. Utanjymdan ýaňa ýere giräýjek bolýan. Kelle çyny bilen futbolda. Çekilýän çilimleň sany sajagy ýok. Onda-da hiç zat üýtgänok.. Şeýdip yzly-yzyna 2 gün uniwesitetde hiç kim bilen gepleşmedim. (Birnäçe adam bilen sögüşdim diýmeseň)

Ine bugünem (oýundan 2 gün soň) oglanlaň biri düýn agşam biziň ýurdumyz 4-1 utdy diýdi. (aslynda 5-1. Futboldan habary ýok. Janymy ýakjak bolýar) Maňa näme diýdim, futbol gepleşesim gelenok diýdim..

Dostlaň biri köşeşdirjek bolýar, entek Bernabeu bar diýýär. Özi ynanýarmy Madridiň ýeňjegine bilemok..