Cristian Gérard Alvaro Gonzálesi, Türkmen sport söýüjileriniň arasynda tanamaýan az bolsa gerek. Türkmenistanyň Indoneziýa bilen oýnan oýunynda ýakyndan görensiňiz, göwresi futbolça meňzemese-de, 35 ýaşynda bolsa-da biziň 25 ýaşly goragçylarymyz 10-12 metr yzyndan kowalapdylar, ol bolsa derwezeban bilen bir bire çykyp goluny salypdy.
1976-njy ýylyň 30-njy awgustynda Urugwaýyň paýtagty Montevideoda doguldy. Urugwaý U-20 ýygyndysynda Álvaro Recoba bilen bile oýnapdy. Urugwaýda Sud America, Huracán Corrientes, Deportivo Maldonado ýaly toparlarda oýnandan soň 2003-nji ýylda Indoneziýanyň PSM Makassar toparyna transfer boldy. Şondan soň
Gonzáles, ildeşimiz Mekan Nasyrowyň oýnaýan topary Persik Kediri, Persib Bandung ýaly toparlarda oýnady. 2011-nji ýylyň sentýabryndan bäri bolsa Persisam Putra Samarinda toparynda oýnaýar.
2010-njy ýylyň 3-nji noýabrynda Indoneziýanyň raýatlygyna geçdi we Indoneziýa Milli Ýygyndysynda oýnap başlady.
Indoneziýanyň Super Ligasynda şu wagta çenli 176 gol saldy we 4 gezek "Möwsümiň iň köp gol salan oýunçysy" baýragyny aldy. Bir gezek bolsa Indoneziýa Kubogynda "Iň köp gol salan oýunçy" baýragyny aldy. 2006-njy ýylda hem "Möwsümiň iň köp gol salan oýunçysy" baýragyny alypdy hem-de Persik Kediri bilen Indoneziýa Super Ligasynda çempion bolupdy. Şol ýyl ol Indoneziýa Super Ligasynyň iň gymmat oýunçysy yglan edilipdi (142 million dollar). Elbetde ol döwürler Mekan Nasyrow Persik Kediride dälde, Azerbaýjanyň FK Karvan toparynda oýnaýardy.
Gonzáles diňe bir ezber hüjümçiligi bilen däl, gany gyzmalygy bilenem ýakasyny tanadan oýunçy. Ol 2003-nji ýyldan bäri Indoneziýa Futbol Federasiýasy (PSSI) tarapyndan 5 gezek jezalandyryldy. Şolardan ikisi bolsa bir ýyl futbol oýnamazlyk jezasydy. Emma ikisinde-de 6 aýdan soň günäsi geçilipdi we Gonzáles jezasyny doly çekmändi. Beýleki üçüsi bolsa 3 oýunlyk jezady, Gonzáles ol jezalarynam çekmändi.
Gonzáles, 1995-nji ýylda Urugwaýda Indoneziýaly Musulman Eva Nurida Siregara öýlendi. Siregar ikisiniň Amanda we Michael atly iki çagasy bar. Gonzálesiň öňki aýalyndanam Fernando we Florencia atly iki çagasy bar. Ol 2003-nji ýylda Musulman bolup adyny Mutafa Habibi diýip üýtgedenem bolsa, janköýerler ony Gonzáles ady bilen tanady, şol bolşuna-da dowam edýär.
0 Teswir:
Yorum Gönder