La Liga (2-nji hepde)

Men özümä Real Madridiň janköýeri. La Ligadaky oýunlary görýän. Ondan başga-da Serie A hem-de Bundesligany habarlardan, bloglardan yzarlaýan. Premier League elbetde dünýäniň iň gowy ligasy, emma o diýen ünsüme çekenok. Indi elim degdiginden başga liga tomaşa edip, La Ligany blogdan çalak-çulak yzarlajaklar üçin ýazjak.

Real Sociedad Barcelona oýunyndan başlaly. Oýun Xavi, Fabregas, Agirretxe hem-de Griezmannyň gollary esasynda 2-2 gutardy. Barcelona-da Iniesta, Puyol, Villa, Messi ýaly oýunçylar ätiýaçda otyrdy. Meýdançada bolsa 32-nji minutda şikes ýeten Sanchez, Fontas dagylar bardy. Barcelona 10-njy, 12-nji minutlarda gol salyp arkaýynlaşan hem bolsa 59, 61-däki gollaryň öňüni alyp bilmedi. Munda Guardiolaň 3-4-3 taktikasynyň hem roly bar diýip pikir edýän. Esasanam goragda Fontas ýaly ýaş hem-de tejribesiz oýunçy barka. Ýene bir bellemeli zadam gola barýan topy eli bilen çykaran oýunça gyzyl kartoçka bermeli diýip bilýän. Emin bolsa Busquetse sary berip oňaýdy.

Villareal Sevilla-da 2-2 gutardy. 23-nji minutda Lopez jerime meýdançasynyň içinde Perrottini ýykyp gyzyl kartoçka aldy we oýundan çykdy. 24-nji minutda Negredo penaltini salyp bilmedi, emma derwezebandan yzyna gaýdan topy derwezä gönükdirmegi başardy. 34-nji minutda bolsa Navarro jerime meýdançasynda Rossini ýykdy we Rossi penaltiden goluny salyp hasaby 1-1 etdi. 72-nji minutda çep tarapda Marchenaň pasyny Ruben hasaby 2-1 etdi. 86-njy minutda Alexisiň süsen topy gol boldy. Hasap 2-2. Şeýlelikde iki topar hem balyny 4-e ýetirdi.

Madrid derbisinde Real Madrid Santiago Bernabueda Getafeni kabul etdi. Benzemaň 2 goly, Ronaldoň salan penaltisi, we oýuna soňundan giren Higuainiň salan gollary esasynda Madrid 4 gol saldy. Ýöne Mikuň salan 2 goluna-da böwet bolup bilmediler. Jose Coentraony başgarak ýerde oýnatmaly. Ýogsam berlen 30 million ýewro harama çykjak. Hem Coentrao hem-de goragyň öňi zaýalanjak. Goragyň öňüne Xabi Alonsoň ýeke özi ýetenok, Coentrao bolsa wezipesini doly ýerine ýetirip bilenok.

Gijäň iň soňky oýunynda Valencia bilen Atletico Madrid duşuşdy. Özüm Galatasarayyňam janköýeri bolamsoň bu oýun meň üçin has gyzyklydy. Valenciada Galatasaraydan giden Mehmet Topal, köneje Real Madridli Soldado hem-de Canales, Atleticoda Arda Turan, Reyes we Diego ýaly göwnüme ýaraýan oýunçylar bardy. Ýöne ikisem oýuna soňundan girdi. Ömrümde birinji gezek bir topara janköýerlik etmän, utmak üçin däl-de futbol görmek üçin, owadan oýundan lezzet almak üçin tomaşa etdim. Sebäbi iki toparyňam ýakynlygy şol bir dereje. Oýunyň birinji ýarymy Valenciaň üstünligi bilen geçdi, golam saldylar. Atletico bolsa ikinji time oýuna giren Arda, Diego ýaly oýunçylar bilen janlanyp başlady. Emma Arda-Diego-Reyes hem-de Portodan 40 milliona alynan Falcaodan ybarat hüjüm güýji topy 3 sütüniň arasyna iberip bilmedi.